Data de emisión: 19 xaneiro 2015
SERIE BÁSICA
Co inicio dunha nova etapa na monarquía española, con Filipe VI, rei de España, ponse en circulación unha nova Serie Básica que reproduce a efixie do monarca. A imaxe foi facilitada pola Casa Real.
A emisión consta de cinco valores imprimidos en offset e un, de maior tamaño, en calcografía que incorpora por primeira vez a esta serie dúas novidades: a realización do selo é autoadhesivo e inclúe Realidade Aumentada (RA). Esta modalidade tecnolóxica, ao ser capturada mediante un smartphone, remite a unha animación e un vídeo sobre a figura do rei Filipe VI. Ao igual que outros selos emitidos en 2015, todos os valores contan coa singularidade de incluír o "ñ" da Marca España.
Esta serie complétase cunha proba de artista Ouro, realizada para o selo de calcografía en ouro de 24 quilates que recobre unha base de prata de 999 milésimas.
A Serie Básica, chamada tamén Serie Xeral ou Definitiva, ten por finalidade cubrir unha ampla gama de valores faciais para atender todas as posibilidades de franqueo. Nos países monárquicos, a serie ilústrase cun retrato do monarca, como é o caso de Gran Bretaña, Suecia ou España, mentres que nas repúblicas se recorre a imaxes coñecidas do país ou a figuras alegóricas, como a Marianne, en Francia.
Xeralmente, a serie presenta algunhas características propias, como facer tiraxes moi extensas ou ilimitadas; reproducir durante anos a mesma imaxe con distintas cores e valores faciais; ter períodos de vixencia e circulación prolongados, ou utilizar diversos dentados, así como diferentes sistemas de impresión. Valla como referencia que durante o reinado de Xoán Carlos I se puxeron en circulación máis de 150 selos da Serie Básica. En total emitíronse seis tipos de series básicas claramente diferenciadas entre si, nas que a imaxe do monarca foi variando co paso dos anos.
Filipe de Borbón e Grecia naceu en Madrid o 30 de xaneiro de 1968. Tras a abdicación do seu pai, Xoán Carlos I, o 19 de xuño de 2014 foi proclamado rei co nome de Filipe VI. Na súa condición de xefe de Estado, simboliza a unidade e permanencia do Estado, exerce unha función arbitral e moderadora do funcionamento das institucións e asume a máis alta representación do Estado español nas relacións internacionais.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.