Arte Contemporáneo Español. Jaume Plensa

ARTE CONTEMPORÁNEA. JAUME PLENSA

Jaume Plensa naceu en Barcelona en 1955. É un artista moi polifacético, escultor e gravador, aínda que tamén probou co debuxo ou a escenografía.
Estudou na Escola Llotja e na Escola Superior de Belas Artes de Sant Jordi.
Empeza a moldear o ferro con técnicas de fundición co que desenvolve formas zoomorfas. Máis tarde utilizaría cristal, resinas e mesmo luces e sons.
Participou tamén no deseño e creación de elementos e decorados para montaxes de ópera e de teatro, sobre todo para a compañía La Fura dels Baus.
Unha das súas obras máis importantes e características é a escultura chamada Alma de Ebro, creada con motivo da Exposición Internacional da Auga que tivo lugar en Zaragoza en 2008. Trátase dunha escultura de 11 metros de altura situada diante do Pazo de Congresos, á beira do río Ebro.
En 2012 obtivo o Premio Nacional de Arte Gráfica outorgada por Calcografía Nacional, que resaltaba a súa traxectoria como artista no campo da arte gráfica.
Expuxo en moitos países, como Francia, Estados Unidos, Suecia ou Alemaña, nos que obtivo grandes recoñecementos en todos eles.
A folla bloque que se presenta sobre o artista mostra unha imaxe do Madison Square Park de Nova York, un parque moi concorrido da cidade dos rañaceos onde a xente adoita sentar a tomar o sol e charlar. Nese parque exhibiuse en 2011 unha das esculturas do artista catalán titulada Echo. Trátase da cabeza dunha nena, de 13 metros e medio de altura, fabricada en resina de fibra de vidro e recuberta de xel de mármore. A escultura está inspirada na ninfa da mitoloxía grega Eco, ninfa que perdeu a súa voz e foi condenada a repetir a palabra dos outros.
Segundo o artista, o rostro da escultura está baseado no dunha nena de nove anos, filla do dono dun restaurante próximo á súa casa en Barcelona.
O selo que completa a folla bloque recolle a imaxe da escultura como motivo principal.