Jerez, Capital Mundial del Motociclismo 2015-2017

XEREZ, CAPITAL MUNDIAL DO MOTOCICLISMO 2015/2017

Xerez da Fronteira foi a primeira cidade da historia elixida pola Federación Internacional de Motociclismo (FIM) como Capital Mundial do Motociclismo 2015/2017.

Xerez é unha referencia no mundo do motor dentro e fóra do territorio nacional. Dende a inauguración do seu circuíto permanente en 1985, organizáronse grandes premios tanto de motociclismo coma de fórmula 1.

Cada ano, miles de afeccionados invaden a cidade durante a celebración do Gran Premio de España, que se converteu no maior evento de concentración moteira da Península.

Por todo iso, o nomeamento como Capital Mundial fai que Xerez sexa coñecido mundialmente non só polos seus eventos deportivos, senón tamén como unha cidade que emana cultura e tradición.

A relación desta localidade co mundo do motor remóntase ao ano 1956, cando, malia non contar aínda cun circuíto permanente, xa se realizaban carreiras urbanas na cidade. As primeiras probas foron de carácter nacional, pero a partir do ano 1963, co Primeiro Gran Premio "Trofeo Internacional A Nosa Señora da Mercede", as competicións fixéronse internacionais.

Coa construción do circuíto permanente, Xerez e os xerezanos viron cumprido o seu soño de converterse na "Catedral do Motociclismo" e o nomeamento como Capital Mundial é un premio merecido despois de tantos anos de esforzo e dedicación a este deporte.

O selo trata de transmitir a idea de Xerez como capital de motociclismo e mostra unha motocicleta pilotada da que sae un ronsel que forma a cidade. O prego, pola súa banda, segue ese xogo entre Xerez e o motor, conxugando a imaxe dunha motocicleta e un cabalo, símbolo indiscutible deste lugar. Por último, leva solapada a bandeira típica que indica a fin de carreira neste tipo de competicións.