Data de emisión: 10 maio 2017
JUVENIA 2017. AVILÉS.
Do 10 ao 13 de maio, Avilés converterase na capital europea da Filatelia coa celebración da vixésimo quinta edición de Juvenia, a cal simultaneará coa primeira edición de MaxiEspaña.
Dende 1971, a Federación Española de Sociedades Filatélicas (FESOFI) organiza Juvenia, onde se premian as mellores coleccións de mozos e mozas afeccionados á Filatelia procedentes de varios países europeos.
Este ano, Avilés foi a elixida para albergar este encontro entre os afeccionados máis novos, pero tamén os veteranos, que achegarán a súa experiencia, ademais de contemplar as novas xeracións filatélicas que veñen pisando firme.
O Grupo Filatélico Avilesino traballou duro para que esta cidade albergue a celebración de Juvenia ´2017. Este ano, ademais, o evento ten un cariz especial, xa que a Federación Europea de Sociedades Filatélicas (FEPA) acaba de outorgar o seu recoñecemento á exposición.
Correos, como vén sucedendo cada ano que se celebra este encontro, emite un selo dedicado a este. Nesta ocasión, o selo recolle unha ilustración da fachada do concello de Avilés en cores vivas, así como o emblema da FESOFI en forma de bolboreta. Preséntase nun Prego Premium deseñado con algúns dos selos que Correos emitiu en edicións anteriores.
Tamén aparecen os logotipos das distintas asociacións que participan na Exposición Nacional de Filatelia Xuvenil: FESOFI, FEPA, FSFI, Cyprus Philatelic Society e a Fédération Française des Associations.
No Prego Premium, unhas zapatillas de cordóns recordan eses novos coleccionistas que participan na exposición, xunto cunha breve recensión que, ademais, menciona os países participantes este ano: España, Francia, Italia e Chile.
Exposicións coma esta demostran que a Filatelia está máis viva ca nunca e que non é só unha afección para maiores, senón que a arte de coleccionar selos non entende de idade nin de fronteiras.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.