Data de emisión: 14 setembro 2018
25 aniversario da última expedición ambulante de Correos
Parece que foi onte, cando o 30 de xuño de 1993 partía da madrileña estación de Chamartín, a que ía ser a última expedición ambulante por ferrocarril de Correos en España, e, en cambio, pasaron xa vinte e cinco anos. Os que a filatelia española conmemora coa emisión deste selo, homenaxe a aquel servizo de transporte de correspondencia e, especialmente, a aqueles homes e algunhas mulleres que se fixeron cargo del e o fixeron posible, contra vento e marea.
Porque, dende as primeiras expedicións ambulantes, alá por setembro de 1855 entre Madrid e Albacete, o traballo dos empregados postais non foi en absoluto cómodo ou doado. Labores de carga e descarga nas estacións, a clasificación da correspondencia en tránsito, a entrega formalizada en destino durante longas xornadas nocturnas sufrindo o troupeleo incesante do tren... nun tempo no que o vapor era a enerxía que movía o mundo.
Os coches e furgóns postais percorreron millóns de quilómetros da nosa xeografía; coches que, serie tras serie, coas súas características propias e as súas transformacións, foron deixando un regueiro de noticias desexadas alá por onde pasaban. Alí todos miran; con ansia suspiran... suspiran con ansia! con máis ansia miran ao coche máis feo! Pero ao que máis queren: ao coche correo! O tren satisfeito, buscando outra aldea, vaise, mófase... que ben o definía Froilán Cete, pseudónimo dun ambulante, no Heraldo Postal de 1908.
Frío no inverno, calor no verán, falta de hixiene, espazos reducidos e perigosidade... que ás veces remataba coa propia morte. Co tempo, as condicións do traballo suavizáronse e se incorporaron os avances da modernización: iluminación e calefacción eléctrica, cociñas, liteiras e duchas, que formaron un novo decorado do interior do coche correo.
Vidas partidas, vidas paralelas, amigos e mesmo amores en cada estación, como na canción de Rafael de León: Volverán as escuras andoriñas, no meu balcón os seus niños a colgar, pero aquel ambulante de Correos, aquel non volverá...
Por iso, Correos devólvenolo nun selo, no que pode contemplarse o exterior dun coche postal da serie 1500 no anverso e, no reverso, o interior deste, onde o ambulante, as sacas e os seus aparellos forman unha visión xa inexistente.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.