12 meses, 12 sellos. La Rioja

12 MESES 12 SELOS. A RIOXA

Este mes de maio Correos dedica na serie 12 meses 12 selos 12 provincias á Rioxa. Unha provincia que ao longo da historia foi terra de paso, de fronteiras, de batallas pero que hoxe, grazas á súa longa historia, contén numerosos atractivos que fan que nos paremos e deteñamos a coñecer esta provincia. Ás veces coñéceselle como "a dos sete vales” Porque xeograficamente está dividida por sete ríos que descenden dende a montaña cara ao Ebro, o cal vertebra a rexión. De forma tradicional divídese en tres subrexións de oeste a leste, seguindo o curso do Ebro: A Rioxa Alta, a Rioxa Media e a Rioxa Baixa. Cada unha delas cos seus correspondentes municipios centrais e de servizos.

Baixo as letras LR e a cor verde na franxa inferior como cor da provincia da Rioxa, incluíronse diferentes elementos característicos desta provincia.

O logotipo do Ano Xubilar Calceatense (1019-2019), que comezou o 25 de abril de 2019 e culminará o 12 de xaneiro de 2020, en Santo Domingo de la Calzada. Hai mil anos, naceu Santo Domingo de la Calzada, un personaxe clave na consolidación do Camiño de Santiago como ruta aberta para peregrinos de todo o mundo. O Ano Xubilar Calceatense é unha alusión directa a este milenario, unha homenaxe ás orixes dunha vocación e ás bases dun Camiño espiritual que resultou esencial no desenvolvemento turístico, cultural, patrimonial e social da Rioxa.

Monumentalmente aparecen no selo por un lado unha torre do Mosteiro de Yuso en San Millán de la Cogolla e por outra, o interior do Mosteiro de Valvanera, este último tamén coñecido por un licor tradicional que se segue elaborando na actualidade. Unha das riquezas dos Mosteiros son as súas bibliotecas xa que estes espazos foron centros neurálxicos da cultura, especialmente na Idade Media. O arquivo e biblioteca mosteiral do Mosteiro de Yuso está considerado entre os mellores de España, nel gárdanse dous cartularios e trescentos volumes orixinais. A orixe da construción do mosteiro reflíctese nunha lenda que narra como o rei García, o de Nájera, ordenou o traslado dos restos de San Millán que se atopaban en Suso ao mosteiro de Santa María La Real de Nájera. Os bois que tiraban da carreta detivéronse no val coma se os restos do Santo non o quixesen abandonar construíndo nese lugar o actual mosteiro de Yuso. Un mosteiro románico dos séculos X e XI do que na actualidade non queda ningún resto, sobre o que se construíu entre os séculos XVI e XVIII o actual mosteiro de Yuso polos abades beneditinos. Os monxes beneditinos trasladáronse ao mosteiro no século X. Un dos abades máis relevantes foi Domingo, natural da poboación rioxana de Cañas, máis coñecido como Santo Domingo de Silos.

Unha copa de viño aparece para homenaxear a D.O.P. Rioja que é a máis antiga de España (1925) e a primeira en obter a Cualificada (1991) sendo, polo tanto, pioneira no bo facer do viño.

Cada 22 xullo na poboación de Anguiano e coincidindo coa Festa da Madalena, prodúcese a espectacular danza sobre zancos de madeira de 45 cm de altura que realizan oito mozos da localidade ataviados estes con chalecos de cores e faldróns amarelos que se lanzan dende a igrexa pola costa empedrada ata a praza. Hai documentos escritos sobre a danza de Anguiano datados en 1603, aínda que se lle supón unha orixe moito máis antiga. Trátase, en todo caso, da manifestación folclórica máis antiga da Rioxa.

Hai máis de 120 millóns de anos neste lugar, Enciso, viviron dinosauros. Viviron nun enclave único, no antigo Mar de Tethys, onde deixaron a súa pegada. Hoxe seguímonos asombrando co seu hábitat, a súa alimentación, a súa forma de vida, de caza... é dicir, coa auténtica natureza dos grandes saurios.