Centenario Valencia CF

EFEMÉRIDES. Centenario do Valencia Club de Fútbol

O 18 de marzo de 1919 é a data oficial da fundación do Valencia Club de Fútbol, un dos clubs máis laureados da historia de España. É o quinto club español con máis títulos logrados, cun total de 22 trofeos, entre os que se inclúen 6 títulos de Liga, 7 Copas do Rei e 1 Supercopa de España. En competicións europeas logrou 3 Copas da UEFA, 2 Supercopas de Europa e 1 Recopa de Europa, e ocupa o cuarto posto da clasificación histórica da Liga de Fútbol Profesional.

O Club constituíuse a instancias dun grupo de afeccionados da cidade de Valencia, capitaneados por Augusto Milego e Gonzalo Medina, que asinaron a acta de constitución do equipo co nome de Valencia Football Club. Tras a súa inscrición no Rexistro de Sociedades, realizaron a primeira xunta oficial o 4 de abril, sorteando a presidencia do club entre Augusto Milego e Gonzalo Medina, lanzando unha moeda ao aire que resultou favorable ao primeiro.

A súa participación no campionato nacional de liga comezou en 1928, o mesmo ano en que esta comezou, xogando a tempada na categoría de prata e logrando o ascenso á primeira división na seguinte. En 1961 participou por primeira vez nunha competición internacional na Copa Europea de Feiras.

A sede do equipo é o estadio de Mestalla, inaugurado en 1923, despois do seu traslado dende o Camp d'Algirós, o primeiro campo propio do Valencia.

Queda para a historia e o recordo do club algúns nomes de xogadores míticos, como o máximo goleador Edmundo Suárez “Mundo”, Antonio Puchades (Tonico), Kempes ou adestradores que marcaron épocas, como Jacinto Quincoces, Alfredo di Stéfano ou Rafa Benítez, quen logrou para o Valencia dúas ligas e unha Copa da UEFA.

A emisión conmemorativa do Centenario do Valencia Club de Fútbol preséntase en forma de folla bloque cun selo e oito viñetas, impreso con diferentes innovacións, como cold foil con efecto prata no texto da acta fundacional ou golpe seco no escudo das orixes do club.