12 meses, 12 sellos. A Coruña

12 MESES 12 SELOS. A Coruña

A serie filatélica 12 Meses, 12 Selos inaugura o ano 2020 coa provincia da Coruña. Imprimido en offset, o seu valor facial permite franquear unha carta normalizada con destino a calquera provincia española.

Como caracteriza esta serie, o motivo do selo constitúeo un mosaico de imaxes con distintos elementos característicos da provincia, que dan forma ás súas iniciais.

Dentro da letra A pódese apreciar a Torre de Hércules e as ameas do castelo de Vimianzo. A Torre de Hércules constitúe un dos monumentos máis característicos e singulares da capital da Coruña. Levantado por Roma entre o século I e II da nosa era, é o faro en funcionamento máis antigo do mundo, declarado Patrimonio da Humanidade pola Unesco no ano 2009.

Tamén coñecido por Torres de Martelo, o castelo de Vimianzo é unha fortaleza edificada a finais do século XII pola liñaxe Mariño de Lobeira. Está catalogada como Ben de Interese Cultural e acolle na actualidade, unha mostra permanente de artesanía popular.

A letra C contén a madeira que simboliza o bastón que utilizan os peregrinos para realizar o Camiño de Santiago, cuxo símbolo con forma de pendente decora o azulexo que se pode apreciar xunto á letra.

O hemiciclo inferior da letra fórmao o rosetón da Igrexa de San Martiño de Noia. Consagrada en 1434 e de estilo oxival, está formada por unha soa nave rematada nunha ábsida pentagonal e un pórtico presidido polos escudos do reino de Castela e León e do arcebispo Santiago Lope de Mendoza, patrocinador do templo.

De fondo ás iniciais, unha imaxe representa a espesura e a frondosidade do bosque do parque natural das Fragas do Eume, coa ponte sobre o río Sesín. O parque foi declarado como Lugar de Importancia Comunitaria sendo as súas fragas consideradas como un dos mellores exemplos de bosque atlántico termófilo do continente europeo.

A banda inferior corresponde á cor da bandeira da provincia da Coruña.