12 meses, 12 sellos. Huelva

12 MESES 12 SELOS. Huelva

Gastronomía, natureza, historia e devoción son algunhas das particularidades que a provincia de Huelva é capaz de ofrecer a todo aquel que pretende coñecela, calidades que foron plasmadas no motivo do sexto selo da serie “12 meses, 12 selos”, que se emite este ano.

Consagrando a gastronomía de Huelva atopamos o xamón curado de Jabugo, con Denominación de Orixe Protexida, cuxa soa denominación fai referencia a un manxar. Procedente de porcos de raza ibérica criados en liberdade na devesa e alimentados exclusivamente con landras e pastos naturais, a súa elaboración localízase no corazón da Serra de Aracena e Picos de Aroche.

O océano Atlántico ofrece, pola súa parte, multitude de peixes e froitos do mar como a moxama, as puntillitas, a gamba branca de Huelva ou a gamba vermella alistada, cuxa imaxe foi reproducida, no selo.

O cultivo intensivo do amorodo supera a cultura gastronómica para ser unha das principais actividades agrícolas da provincia, que chega a ser na actualidade a maior produtora de Europa e unha das principais do mundo.

A provincia de Huelva quedou unida á Historia Universal por ser o lugar no que Cristóbal Colón realizou os preparativos para a expedición que debía descubrir o Novo Mundo, que partiu en 1492 do porto de Palos de la Frontera.

Os chamados “Lugares Colombinos” inclúen o Mosteiro de Santa María de La Rábida, Moguer e Palos de la Frontera, en cuxo peirao das Carabelas, hai unha reprodución da Santa María, a Pinta e a Niña.

O Santuario da Nosa Señora do Rocío, cuxa fachada reproduce o selo, simboliza o fervor relixioso dunha das romaxes máis populares de España, que pode chegar a congregar máis dun millón de persoas. A ermida eríxese na aldea do Rocío, dentro do municipio de Almonte, lindando co Parque Nacional de Doñana. Precisamente unha panorámica deste parque, coñecido tamén como Coto de Doñana, reprodúcese como fondo ao selo.

A cor azul escura da banda inferiorreproduce a cor da bandeira da provincia.