12 meses, 12 sellos. Jaén

12 MESES 12 SELOS. XAÉN

O sétimo selo da serie Doce meses, doce selos está dedicado á provincia de Xaén, cuxos atributos máis relevantes aparecen en distintas imaxes que forman a letra inicial da provincia.

O selo ábrese como unha ventá á paisaxe de oliveirais de Mogón, representativo da paisaxe xienense, tapizado pola trama de oliveiras que cobre a provincia.

Flanqueando a inicial, no lado esquerdo, vemos unha das columnas dos Baños Árabes de Xaén, coñecidos como Baños del Niño, que foron edificados no século XI sobre os vestixios duns baños romanos. No século XVI, volveuse edificar enriba, o pazo renacentista do primeiro Conde de Villardompardo.

A outra columna pertence ao pazo de Jabalquinto de Baeza, sede actual da Universidade Internacional de Andalucía, que salienta pola beleza da súa fachada, ricamente decorada, e pola do seu patio de columnas, de dobre arcada, cuxas columnas de mármore dispoñen de escudos nas pendentes. En 2003, foi declarado Patrimonio da Humanidade pola Unesco, de xeito conxunto coa Sacra Capela de San Salvador de Úbeda, cuxa fachada e campanario aparecen na base da inicial. A capela foi construída baixo o patrocinio de Francisco de los Cobos, Secretario do emperador Carlos V, como panteón anexo ao seu pazo de Úbeda. Ambos os dous pazos que forman o conxunto monumental renacentista de Baeza e Úbeda están considerados como máximos expoñentes da arquitectura renacentista en España.

Na parte superior da inicial apréciase o campanario da catedral de Xaén, consagrada á Asunción da Virxe, edificada polo arquitecto Andrés de Vandelvira, seguindo o estilo renacentista máis puro.

A arte antiga apréciase na figura da Esfinxe de Cástulo, descuberta na Necrópole dos Higuerones, datada no século VII a.C e pertencente ao conxunto arqueolóxico de Cástulo, Linares. A figura con corpo de león, ás de aguia e cabeza humana, porta a dobre coroa dos faraóns de Exipto.

Por último, a franxa inferior de cor verde do selo, corresponde á cor da bandeira da provincia.