Diarios Centenarios. 100 años de la Gaceta de Salamanca

DIARIOS CENTENARIOS. La Gaceta Regional de Salamanca

Un venres 20 de agosto do ano 1920, nace o rotativo La Gaceta Regional, co subtítulo Diario de Salamanca, quedando patente dende a súa orixe a vocación de ser un medio de información ao servizo da cidade e a provincia. Un medio que, ao longo do seu século de vida, foi notario fiel dos acontecementos que sucedían en Salamanca, pero tamén en España e en Europa, o que se reflectiu no motivo do selo que conmemora o seu centenario de vida. Desta forma, rodeando a cabeceira, aparecen exemplares dos seguintes anos: 1920, ano da súa fundación; 1945, fin da Segunda Guerra Mundial; 1978, promulgación e aprobación da Constitución española e 1989, ano da caída do muro de Berlín.

A tirada do primeiro número foi de dous mil exemplares que, ao prezo de dez céntimos cada un, saíron á rúa ás seis e media da tarde, subliñando deste xeito o carácter vespertino de La Gaceta, que foi vendido nas rúas de Salamanca á voz de Saíu La Gaceta!

Comezou a tirarse nas rotativas situadas na antiga igrexa de San Isidro e, na súa primeira plana, o primeiro director de La Gaceta, Buenaventura Benito, expoñía o manifesto fundacional do xornal baixo o titular A nosa Fe de vida, cuxa declaración de principios respondía á vontade dun grupo de empresarios salmantinos xunto ao banqueiro Matías Blanco Cobaleda, quen deu o apoio económico ao diario para dar voz a un amplo sector social de sensibilidade católica e monárquica, quedando patente a súa orientación tradicional e conservadora. Esta orientación política, xunto coa vontade de facer un xornal de noticias como dicía o seu lema coa maior cantidade de información na provincia de Salamanca, marcaba o contrapunto ante o seu rival, El Adelanto, cuxo corte máis liberal ofrecía unha maior inclinación cara á tribuna de opinión.

Queda para o recordo e a historia de La Gaceta Regional algúns dos seus primeiros directores que marcaron a traxectoria da cabeceira, como Jose M.ª Gil-Robles, Juan Aparicio López ou Francisco Bravo Martínez, ou de xornalistas como Francisco Casanova.

Concluía a súa primeira tribuna Buenaventura Benito dicindo: “Chegaremos onde se poida; os desexos de cantos contribuímos á saída da Gaceta Regional son de vasto alcance” do que dá fe pública, no seu centenario, o presente selo.