Efemérides. 75 aniversario del Decreto de creación del DNI

EFEMÉRIDES. 75 Aniversario do Decreto do DNI

Unha fotografía, unha pegada dixital, unha sinatura e un número de identificación único e persoal son os elementos que caracterizaron o Documento Nacional de Identidade, un documento que na súa creación, por un decreto do 2 de marzo de 1944, provocou receos entre a cidadanía pero que actualmente se converteu nun dos documentos máis versátiles, eficientes e prácticos cos que conta un español para ser identificado como cidadán e co que se pode relacionar de xeito eficaz coa Administración do Estado.

Tal como se indicaba no preámbulo do decreto, o DNI pretendía substituír a Cédula Persoal como elemento de identificación, así como outros documentos que xa existían como a Tarxeta de Identidade Postal que expedía Correos para identificar destinatarios e que permitía realizar outros trámites coa Administración Postal.

A súa expedición e distribución encomendouse á Dirección Xeral de Seguridade, que non puido implantar o documento ata 1951 debido á situación política e social da posguerra. O primeiro deseño foi adxudicado a Aquilino Rieusset, estando vixente ata 1961. En 1962 cambiou o formato, que incorporou o grupo sanguíneo e o estado civil.

En 1985 adxudícase a fabricación do DNI á Fábrica Nacional de Moeda e Timbre, que xunto coa Dirección Xeral de Policía, garantían a súa expedición.

Ao longo dos anos 90 informatízase a súa produción e incorpóranse as primeiras medidas de alta seguridade, redúcese o seu tamaño e elimínase a impresión dactilar. En 1996 incorporouse a fotografía en cor e a partir do ano 2000 expídese nas linguas cooficiais do Estado.

As novas tecnoloxías incorpóranse ao documento a partir de 2006, cando se integra un chip que permite a conexión a servizos telemáticos.

En 2015 aparece a versión electrónica, chamado tamén DNI 3.0, en cuxo deseño se incluíron dúas antenas, unha de radiofrecuencia e outra con tecnoloxía NFC que permite a súa utilización con aplicacións de telefonía móbil.

A presente emisión reproduce de xeito fiel o último modelo de DNI, imitando mesmo o papel plastificado deste.