Museos

MUSEOS

Este ano tres novos museos españois protagonizan a serie que Correos dedica a estes templos da arte, a historia e a cultura do noso país.

O primeiro dos Pregos Premium está dedicado ao Museo da Evolución Humana. Situado no centro de Burgos, foi deseñado polo arquitecto Juan Navarro Baldeweg no lugar onde séculos atrás estivo o desaparecido convento de San Pablo, da orde os dominicanos. O Museo foi integrado na declaración dos xacementos de Atapuerca como Patrimonio da Humanidade en 2015. O obxectivo principal do MEH é conservar, inventariar e divulgar os restos arqueolóxicos procedentes dos xacementos da Serra de Atapuerca. No selo pódese ver a fachada do Museo e unha imaxe do cranio coñecido como Miguelón.

O Museo da Ciencia e o Cosmos de Tenerife creouse en 1993 promovido polo Instituto de Astrofísica de Canarias en colaboración co Cabido de Tenerife. O Museo foi inaugurado polo astronauta ruso Sergei Krikalev. O Museo da Ciencia e o Cosmos ofrece ao visitante unha exposición permanente que inclúe elementos que convidan a participar nun safari cósmico arredor do Universo.

O selo recolle unha imaxe da praza do Museo, onde salienta a grande antena do radiotelescopio, icona que mellor o identifica polo seu impacto visual a gran distancia e onde aparecen pintadas as coordenadas dos “Montes Tenerife” na superficie da Lúa.

O terceiro Prego Premium está dedicado ao Teatro-Museo Dalí. Foi construído sobre os restos do antigo Teatro Municipal de Figueres e inaugurado en 1974.

Concibido e orquestrado por Salvador Dalí co obxectivo de que aquel que o visitase, vivise unha verdadeira experiencia sensorial viaxando ao seu peculiar mundo interior.

Percorrer as súas salas é viaxar dende as súas primeiras experiencias artísticas ata as obras dos últimos anos da súa vida, pasando polo surrealismo, a mística nuclear e a paixón pola ciencia.

O selo recolle unha imaxe dunha das súas espectaculares salas cheas de cor e mística.