Disello VII. 1º Premio Categoría Xuvenil

VII CONCURSO DISELLO 2020

Por sétimo ano consecutivo, Correos organizou durante este accidentado ano 2020 o Concurso Nacional de Deseño de Selos cunha ampla participación, acadando as 1.767 persoas. 

Este 2020 a temática das obras tiña o lema: un selo polo clima, poñendo no centro do discurso artístico o tema ambiental, cambio climático e a participación das persoas no mundo que nos arrodea.

O deseño sempre é un reto á imaxinación, pero deseñar para un espazo tan pequeno e que condense toda a información que se queira contar (8 cm²) require un dobre esforzo que, á vista da calidade das obras presentadas, os participantes superaron notablemente.

Das 80 obras finalistas, 40 por categoría, o xurado decidiu os premiados do VII Concurso Nacional de Deseño de Selos 2020:

1º Premio categoría xeral, Bárbara Llinares Mira (Valencia)

1º Premio categoría xuvenil, Jorge Martín Allas, alumno do Colexio Marista Nosa Señora de Fuencisla (Segovia).

O selo gañador na categoría xeral amosa unha acuarela que a propia autora describe como un cambio na conciencia social, é o cambio cara a un futuro positivo, sostible e posible. Un sopro á esperanza, á vida que converte o que toca co seu alento en cambio, nun futuro sen contaminación respectuoso co ambiente.

Na categoría xuvenil, a obra que obtivo o 1º premio é un debuxo pintado con rotulador e lapis de cor cun estilo realista que nos amosa o corazón como o lugar no que habitamos e que aínda que non o vexamos o sentimos, tendo que protexelo para poder sobrevivir. 

Os gañadores dos primeiros premios terán a satisfacción de poder ver o seu deseño en circulación, xa que Correos se encargará de producir e emitir no ano 2021 os selos cos deseños premiados. Ademais, como o ano pasado, o deseñador do primeiro premio da categoría xeral terá a oportunidade de deseñar diferentes obxectos filatélicos durante o 2021.

En breve comezará a VIII convocatoria do Concurso Nacional de Deseño de Selos 2021 que terá como temática un selo polos que nos coidan. Dende Correos anímase a participar para expresar a través dun selo o agradecemento, de homenaxe por todas aquelas persoas que coidan día a día da sociedade, sobre todo en períodos de crise como a da Covid-19.