Marabillas do Mundo Moderno. Coliseo Romano

MARABILLAS DO MUNDO MODERNO. COLISEO ROMANO.

O Coliseo de Roma protagoniza un novo selo dedicado a un dos monumentos máis visitados de Italia. 

Xogos de gladiadores, loitas contra animais e mesmo, batallas navais, son algúns dos espectáculos que se viviron neste lugar.

O seu verdadeiro nome é o anfiteatro de Flavio, pero coñéceselle como Coliseo, quizais, pola “colosal” estatua de Nerón que se situaba nos arredores.

Este lugar supoñía o principal entretemento do pobo na antiga Roma. Máis de 50.000 espectadores podían participar das sanguentas diversións con que os emperadores cortexaban o pobo.

A súa construción comezou baixo o poder do emperador Vespasiano sobre o ano 71 d.C e a súa inauguración produciuse no ano 80 baixo o reinado do seu fillo Tito.

A súa estrutura radial organizábase en cinco niveis con áreas delimitadas segundo a clase social. 

Ata o século XX ningún outro edificio superou en capacidade ao anfiteatro Flavio.

No ano 2007, seguindo o ronsel das Sete Marabillas do Mundo Antigo, das cales, só segue en pé a Gran Pirámide de Guizá, elixíronse entre decenas de monumentos de todo o mundo as que son consideradas as Sete Marabillas do Mundo Moderno.

Entre as 77 candidatas, xunto ao Coliseo, resultaron elixidas a cidade de Petra o Taj Mahal, Machu Picchu, a pirámide de Chichén Itza, a Gran Muralla de China e a estatua do Cristo Redentor de Río de Xaneiro, a todas elas Correos lles dedicou un selo en anos anteriores.

Este ano, co selo dedicado ao Coliseo de Roma, Correos pecha esta serie sobre as Sete Marabillas do Mundo Moderno.

O selo, ten como fondo as cores da bandeira italiana e amosa un detalle da fachada exterior deste mítico monumento.