Patrimonio Mundial 2021. Centro Histórico de Toledo

PATRIMONIO MUNDIAL. CENTRO HISTÓRICO DE TOLEDO.

Como cada ano, Correos emite un selo dedicado a Patrimonio Mundial, neste caso, ao Centro Histórico de Toledo, inscrito nesta privilexiada lista de Cidades Patrimonio Mundial da UNESCO.

Toledo, cidade das tres culturas, é testemuño de diferentes civilizacións que pasaron por España e que deixaron a súa pegada nas súas rúas e prazas.

Cidade romana, capital visigoda, parte do Emirato de Córdoba, centro da Reconquista cristiá ou sede da corte de Carlos I de España e V de Alemaña.

Pasear polas súas rúas é regresar a un pasado rico en arte, cultura, costumes e relixións.

Na súa zona histórica podemos descubrir reminiscencias desas tres culturas tan relevantes na capital manchega: a xudía, a musulmá e a cristiá.

Da Toledo cristiá cómpre salientar o seu Alcázar, a Catedral de Santa María, igrexas, conventos e mosteiros como o de San Juan de los Reyes. Do seu pasado árabe consérvase o tecido de rúas estreitas e sinuosas, e mesquitas como a do Cristo de la Luz, de ladrillo e cachotería, arcos entrelazados e teitumes de madeira. A presenza xudía pódese rastrexar nas Sinagogas do Tránsito e de Santa María la Blanca.

A cidade tamén atraeu grandes artistas de renome universal, como Domenikos Theotokopoulos, El Greco, quen residiu en Toledo dende 1577 ata a súa morte e se converteu tamén nun dos emblemas máis significativos da cidade.

O selo, que está enmarcado nunha bela calcografía, ten forma de moeda de dous euros, 

O anverso da moeda que reproduce o selo, representa a imaxe da Porta do Sol, edificio de estilo mudéxar que data do século XIV e un detalle da decoración mural da Sala de Oración da Sinagoga de Samuel Leví, situada na xudaría toledana, actual Museo Sefardí.